१३ मंसिर, काठमाडौं । भिनिसियस जुनियरले खेल सकिन तीन मिनेटअघि गोल गरेपछि रियल मड्रिडले स्पानिस ला लिगामा सेभियालाई २-१ ले पराजित गरेको छ । घरेलु मैदानमा एक गोलले पछि परेको रियलले पुनरागमन जित निकालेको हो ।
राफा मिरले खेलको १२औं मिनेटमा गोल गर्दै सेभियालाई अग्रता दिलाएका थिए । तर ३२औं मिनेटमा करिम बेन्जामाले रियलका लागि बराबरी गोल गरे ।
८७औं मिनेटमा भिनिसियसले एडर मिलिटाओको पासमा गोल गर्दै रियललाई २-१ को जित दिलाए । जितपछि १४ खेलबाट ३३ अंक जोडेर रियल शीर्ष स्थानमा छ । रियल सोसिडामड स्पानयोसंग १-० ले पराजित हुँदा रियललाई फाइदा समेत पुगेको छ । सेभिया १४ खेलबाट २८ अंकसहित चौथो स्थानमै छ ।
यस्तै एट्लेटिको मड्रिडले काडिजलाई ४-१ ले पराजित गर्दै दोस्रो स्थानमा उक्लेको छ । एट्लेटिकोका लागि थोमल लेमार, एन्टोनी ग्रीजमन, एन्जन कोरेअ र माथुज कुन्हाले गोल गरे । काडिजका लोजानोले एक गोल फर्काए ।
जितपछि एट्लेटिको १४ खेलबाट २९ अंक जोड्दै सोसिडाडलाई गोल अन्तरमा पछि पारेर दोस्रो स्थानमा उक्लेको हो । १५ खेल खेलेको सोसिडाड तेस्रो स्थानमा झरेको छ ।
यस्तै जुअनमीको ह्याट्रिकमा रियल बेटिसले लेभान्टेलाई ३-१ ले पराजित गरेको छ ।
जितपछि १५ खेलबाट २७ अंक जोडेर बेटिस पाँचौ स्थानमा छ ।
Khemraj wali
0 Comments