वर्षाले छाडेपछि रेश्मा, उषा हुँदै गरिमालाई ‘सुदुर’को अफर

निर्देशक रमेश वुढाथोकी चलचित्र ‘सुदुर’का लागि नायिका नपाएर हैरान छन् । नायिका वर्षा सिवाकोटीले चलचित्रमा काम गर्ने पक्का गरेकी थिइन् । तर, चलचित्रको छायांकन सुरु हुन लामो समय लागेपछि वर्षाले नयाँ चलचित्रलाई समय दिनुपर्ने भन्दै ‘सुदुर’ छाडिन् ।

यसपछि भने रमेशलाई नायिका खोज्न नै सकस परिरहेको छ । चलचित्रको नायकका लागि पुष्प खड्कालाई अफर गरिएको छ । तर, पुष्प र चलचित्रको निर्माणपक्षविच पारिश्रमिकको विषयमा कुरा मिलिरहेको छैन ।

रमेश भने नायिका खोज्ने धुनमा लागिरहेका छन् । वर्षाले छाडेपछि चलचित्रको अफर नायिका तथा मोडल रेश्मा घिमिरेसम्म पुग्यो । रेश्मासँग कुराकानी भएको निर्देशक वुढाथोकीले अनलाइनखबरसँग बताएका थिए ।

रेश्माले पनि चलचित्र नगरेपछि यसको निर्माणपक्षले टिकटकबाट उदाएर म्यूजिक भिडियोमा जमिरहेकी मोडल उषा उप्रेतीलाई पनि अफर गरेको थियो । उषापछि यसको निर्माणपक्षले टिकटकबाट उदाएकी मोडल गरिमा शर्मालाई अफर गरेको छ । चलचित्र प्राविधिक संघका अध्यक्ष पुष्कर लामाले गरिमा शर्मासँग कुराकानी गरेको जानकारी सामाजिक संजालबाट दिएका छन् । रमेश वुढाथोकीको निर्देशनमा तयार हुने यो चलचित्रको छायांकन जुम्लामा हुनेछ ।

तर, चलचित्रका लागि कलाकार फाइनल गर्न नसक्दा छायांकन सुरु हुन सकेको छैन । अब, गरिमाले यो चलचित्र गर्छिन् या गर्दिनन् त्यो भोलीको कुरा हो । तर, रमेश वुढाथोकीलाई भने चलचित्रको नायिका खोज्न सकस परिरहेको छ ।

Bijay Awaj